Aínda que o centro da nosa cidade é un punto de encontro, traballo e lecer fundamental para a veciñanza, son os barrios onde maioritariamente residimos e pasamos outras tantas horas do noso día. Por iso, é fundamental que o espazo público estea igualmente coidado en todas as zonas, e que existan os mesmos recursos que permitan un mantemento continuado e adaptado ás distintas particularidades das rúas, prazas, zonas verdes e estradas urbanas.
Esta é unha das medidas fundamentais que recolle o novo contrato para non deixar ninguén atrás, xa que todos os barrios son igualmente importantes: extensión a toda a cidade dun sistema de limpeza efectivo de forma regular e continuado, segundo o nivel de ocupación e frecuencias de uso en cada distrito.
Unha medida imprescindible por equidade (até agora só se limpaba con auga de forma regular no centro) e por eficacia (consegue eliminar sucidade que doutro xeito fica incrustada).
A renovación da flota de maquinaria, en liña co compromiso natural, saudable e comprometido, inclúe tecnoloxías que minimizan o impacto ambiental e son respectuosas co descanso da cidade en horas nocturnas e nas primeiras horas do día, grazas a vehículos con tecnoloxías eléctricas, a gas ou híbridos que actúan cunha mínima emisión de ruídos no cadro dun sistema máis sustentable.
As novas principais que traerá consigo esta nova licitación organízanse en torno de grandes liñas de actuación que inclúen novas zonas de intervención, dotacións e recursos equitativos e adaptados, e reforzos especiais en datas destacadas, ademais de garantir o mantemento regular e continuado da limpeza dos espazos.
As papeleiras que actualmente están distribuídas pola cidade serán substituídas por outras novas de forma adaptada a cada ambiente, con modelos especiais para lugares de valor patrimonial, zonas verdes e espazos infantís. Ademais, establecerase por contrato un sistema regular de limpeza e mantemento das mesmas con accións rutineiras e reforzos especiais de carácter trimestral, que serán revisados polo control de calidade.
Agrela e Pocomaco acollen boa parte do tecido empresarial e industrial da cidade. Un gran número de metros cadrados en constante produtividade con grande actividade de vehículos e persoas, que durante o día funciona como se dun barrio máis se tratar. A especial aposta do novo contrato garante para eles un plan adaptado de limpeza con varridos manuais, mecánicos, e accións de reforzo especiais en todas as zonas.
A Coruña é unha cidade que vive cara ao mar, onde se concentran actividades deportivas e de lecer, acompañando o uso natural das praias. Ademais dos reforzos habituais nos meses de verán, de outubro a maio será realizado un seguimento estabilizado da limpeza dos areais, o que nos permite ter as praias coidadas e libres de residuos durante todo o ano. Instalaranse tamén novos colectores e papeleiras con sistema de recolla selectiva para evitar que ningún residuo chegue ao mar.
Na actualidade, o lecer nocturno da cidade concéntrase nunha estrutura de rúas e prazas no centro onde conviven negocios de restauración e hostalaría con zonas residenciais de grande densidade de poboación. Co fin de respectar todas as circunstancias que se concentran nestas zonas, os equipos de limpeza actuarán en horario vespertino, comezando cos traballos unha vez pechados os establecementos e finalizando a tempo para que a veciñanza poida comezar o día co barrio totalmente recuperado da actividade nocturna.
Nas datas especiais de celebracións e lecer, aumenta notablemente a cantidade de residuos e sucidade que xeramos pola ocupación masiva de espazos reducidos. Feito que require dun dispositivo especial de limpeza cando os festexos finalizan, e que non debe alterar o transcurso regular de limpeza do resto da cidade. Así, serán habilitados equipamentos específicos de limpeza con recursos humanos e materiais que realizarán un labor intensivo acorde ao volume de residuos xerados, devolvendo así os espazos ao seu aspecto natural da forma máis rápida posible. O mellor exemplo témolo co San Xoán, onde, grazas á sensibilización cidadán e ás medidas especiais, nos últimos tres anos reducíronse nun 45% os residuos depositados.
O novo plan de limpeza viaria recolle tamén os medios precisos para actuar con rapidez e solvencia fronte a danos ocasionados no espazo público por faltas de civismo ou vandalismo, que derivan en pintadas, gomas de mascar coladas e manchas de gran tamaño.
Os meses de outono traen consigo a caída continua da follaxe das árbores, que cobren os pavimentos das rúas e, en ocasións, dificultan a súa accesibilidade e provocan pequenas caídas ou esvaróns. Para solucionar este fenómeno natural, profesionalizaranse os sistemas de recolla con maquinaria eléctrica especializada de sopro e aspersión que actuarán por todos os barrios de forma regular minimizando os ruídos dos sistemas actuais.
Métodos máis profesionalizados e adaptados mediante sistemas mecánicos de calor e outros produtos naturais, permitirán optimizar o reforzo especial para a erradicación da vexetación espontánea que xorde nas nosas beirarrúas, especialmente nos meses de primavera. Medidas que, xunto coa eliminación de herbicidas tóxicos en prazas, xardíns e parques infantís, garanten unha estratexia de coidado do espazo público máis saudable para todos e todas.
Para manter o espazo público coidado todo o ano é precisa capacidade de resposta perante imprevistos. Nesta liña, habilitarase un dispositivo especial de emerxencia para actuar rapidamente contra vertedoiros incontrolados tanto en solo público como en parcelas privadas.
Unha vez por ano, en todos os distritos, contémplase e garántese unha limpeza intensiva con auga a presión, que se superpón aos coidados diarios e rutineiros. Un dispositivo especial que baldea con auga a presión todas as rúas sen os vehículos estacionados, o que permite un nivel de limpeza máis intensivo e eficiente.